Í gærkvöldi opnaði Icelandair nýja setustofu, Saga Lounge, í nýrri byggingu á efstu hæð flugstöðvar Leifs Eiríkssonar. Um er að ræða 1.400 fermetra svæði þar sem fer saman norræn hönnun, innblásin af íslenskri náttúru og menningu og útsýni yfir flugstarfsemina á vellinum og alla leið til Snæfellsjökuls.
Nýja setustofan er um tvöfalt stærri en sú eldri, sem var í kjallara flugstöðvarinnar. Sætum og veitingastöðum er fjölgað og þægindi aukin. Icelandair Saga Lounge er einn af fjölsóttari samkomustöðum landsins en gert er ráð fyrir að gestir félagsins þar verði um 120 þúsund á árinu.
Setustofan var hönnuð af Eggert Ketilssyni og Stíg Steinþórssyni, sem höfðu að leiðarljósi stefnu Icelandair um að bjóða viðskiptavinum endurnærandi íslenska upplifun með lita,- og efnisvali og sérstökum munum eins og afsteypu af þekktum álfasteini.