Hafið er söluferli á tequilafyrirtæki stórleikarans George Clooney, Casamigos. Áfengisfyrirtækið Diageo er að kaupa fyrirtækið og mun greiða fyrir það allt að milljarð Bandaríkjadala eða því sem nemur 105 milljörðum íslenskra króna.
Clooney á fyrirtækið með þeim Rande Gerber og Michael Meldman.
„Ef þú hefðir spurt okkur fyrir fjórum árum hvort við myndum eiga fyrirtæki sem er metið á milljarð dala, held ég ekki að við hefðum sagt já,“ sagði Clooney í skriflegu svari til fréttastofu CNBC um söluna. „Þetta sýnir trú Diageo á fyrirtækið okkar og trú okkar á Diageo. En við erum ekki að fara neitt. Við verðum enn stór hluti af Casamigos. Byrjum með skoti í kvöld. Kannski tveimur.“
Gert er ráð fyrir því að salan fari í gegn seinni hluta ársins.
Casamigos, sem þýðir „hús vina“ byrjaði sem einkasafn félaganna á tequila sem átti aðeins að vera fyrir vini þeirra og ættingja. Árið 2013 fengu þeir hinsvegar leyfi til þess að framleiða sitt eigið tequila.