Kínverski bílasmiðurinn Great Wall Motors hefur áhuga á að taka yfir Fiat Chrysler. Kaupin munu annaðhvort ná yfir allt fyrirtækið eða hluta þess, til að mynda bíltegundina Jeep.
Greint er frá viðræðunum á fréttavef Reuters.
Uppi hafa verið getgátur um að kínverskur bílasmiður hafi í síðustu viku gert yfirtökutilboð í Fiat Chrysler og hækkaði fyrirtækið á hlutabréfamarkaðinum í Mílanó í kjölfarið.
„Í tengslum við þetta mál höfum við í hyggju að taka yfir fyrirtækið. Við höfum áhuga á Fiat Chrysler,“ sagði starfsmaður Great Wall Motors í samtali við Reuters í dag en kaus að halda nafnleynd. Hann gaf ekki meira upp um viðræðurnar.
Þá er vitnað í tölvupóst frá forstjóranum Wang Fengying þar sem hann lýsir yfir áhuga á Fiat Chrysler, sér í lagi bíltegundinni Jeep. Talsmaður hefur staðfest að áhugi sé til staðar en segir að ekkert tilboð hafi enn verið lagt á borðið. Yfirtakan myndi styrkja innreið Great Wall Motors á Bandaríkjamarkað sem talið er að standi til.
Forstjóri Fiat Chrysler hefur leitað að kaupanda eða meðeiganda í fyrirtækinu til þess að takast á við hækkandi kostnað, hertar útblástursreglugerðir og setja aukinn kraft í þróun rafbíla og sjálfkeyrandi bíla. Fyrirtækið hefur ekki gefið út neina yfirlýsingu um málið.
Fiat Chrysler framleiðir einnig Alfa Romeo, Maserati og RAM.