Bláa lónið hefur sagt upp fjórum starfsmönnum, þeirra á meðal Dagnýju Hrönn Pétursdóttur framkvæmdastjóra. Uppsagnirnar eru hluti af skipulagsbreytingum að sögn Gríms Sæmundsen, forstjóra og eins stærsta hluthafa fyrirtækisins.
Grímur segir í samtali við mbl.is að verið sé að endurskipuleggja liðsheild Bláa lónsins fyrir komandi verkefni og að ekki standi til að ráða í framkvæmdastjórastarfið.
Fyrst var greint frá málinu á Vísi. Þar kemur fram að Dagný hafi starfað hjá Bláa lóninu allt frá árinu 2007 og að hún eigi óbeint rúmlega 0,8 prósents hlut í fyrirtækinu.
Fyrr í sumar var greint frá því að ekkert yrði af sölu á 30 prósenta hlut HS Orku í Bláa lóninu en fulltrúar íslenskra lífeyrissjóða, sem eiga 33,4 prósent í HS Orku í gegnum samlagshlutafélagið Jarðvarma, ákváðu í lok síðustu viku að beita neitunarvaldi sínu og höfnuðu rúmlega 11 milljarða króna tilboði í hlutinn.