Kristján Daníelsson lætur af störfum sem framkvæmdastjóri Kynnisferða eftir að hafa leitt félagið í sex ár. Í stað hans kemur Björn Ragnarsson, rekstrarstjóri hópbifreiða Kynnisferða, en hann sinnir starfinu tímabundið þar til nýr framkvæmdastjóri hefur verið ráðinn.
Þetta kemur fram í tilkynningu frá Kynnisferðum en þar segir að stjórn félagsins og Kristján hafi komist að samkomulagi um að hann láti af störfum.
Björn er viðskiptafræðingur að mennt og var áður fjármálastjóri Bláa lónsins, framkvæmdastjóri bílaleigunnar ALP og framkvæmdastjóri bílasviðs Bílabúðar Benna.