Tryggingafélagið VÍS fækkar framkvæmdastjórum í nýju skipuriti og jafnar kynjahlutföll í framkvæmdastjórn. Í fréttatilkynningu frá VÍS segir að framkvæmdastjórarnir verði nú fjórir í stað sex áður og stjórnendur 26 í stað 33.
Aukin áhersla verður þá lögð á öfluga þjónustu við viðskiptavini og stafrænar lausnir. Er þetta sagt vera gert til að búa fyrirtækið betur undir þær framtíðaráskoranir sem blasa við.
Með hinu nýja skipuriti verður Auður Björk Guðmundsdóttir framkvæmdastjóri þjónustu, Guðný Helga Herbertsdóttir verður framkvæmdastjóri stafrænnar þróunar og Ólafur Lúther Einarsson verður framkvæmdastjóri kjarnastarfsemi. Valgeir M. Baldursson kemur nýr til félagsins og verður framkvæmdastjóri fjárfestinga og reksturs, en hann var áður forstjóri Skeljungs.
Þeir Agnar Óskarsson, framkvæmdastjóri tjónasviðs, Guðmar Guðmundsson, framkvæmdastjóri fjármálasviðs, og Þorvaldur Jacobsen, framkvæmdastjóri þróunarsviðs, láta hins vegar af störfum í kjölfar þessara breytinga.