Dow Jones hlutabréfavísitalan féll í dag um rúmlega 1.000 stig í annað skipti á innan við viku. Dow Jones féll á mánudag um 1.175 stig, sem var mesta lækkun vísitölunnar á einum degi frá því í fjármálakreppunni 2008.
BBC segir Dow Jones hafa lækkað um 4,15% og hafi við lokun markaða staðið í 23.860 stigum.
Nokkur viðsnúningur hafði verið í kauphöllinni í New York á þriðjudag, eftir fallið á mánudag, en sá viðsnúningur virðist ekki hafa verið varanlegur.
S&P 500 vísitalan lækkaði einnig í dag og féll hún um 100,58 stig eða 3.75% og var í lok dags í 2.581 stigum. Nasdaq vísitalan féll þá um 3,9%, eða 274,8 stig og stendur nú í 6.777,1.
BBC segir lækkun einnig hafa verið á öllum helstu verðbréfamörkuðum í Evrópu í dag.
Breska FTSE 100 vísitalan hafði lækkað um 1,49% við lokun markaða í London og stóð þá í 7.170,69 stigum. Í Frakklandi og Þýskalandi féllu vísitölurnar um 2,6% og 2%.
Óttast menn að verðbólga og vextir muni aukast með auknum styrk alþjóða hagkerfisins og er það talið valda lækkuninni nú.