VÍS væntir mun meiri hagnaðar

Vís sendi frá sér jákvæða afkomuviðvörun eftir lokun markaða í gær. Drög að árshlutauppgjöri sýna að hagnaður á fyrsta ársfjórðungi fyrir skatta er um 930 milljónir króna en afkomuspá félagsins gerði ráð fyrir hagnaði upp á 276 milljónir króna.

Ávöxtun skráðra fjárfestingaeigna félagsins reyndist hagstæðari um sem nemur 350 milljónum króna umfram afkomuspá og afkoma af vátryggingarekstri var umfram væntingar sem nemur 300 milljónum króna.

Góður árangur af vátryggingarekstri á fyrsta ársfjórðungi gerir það jafnframt að verkum að ekki gerist þörf á að uppfæra spá félagsins um  samsett hlutfall fyrir árið þrátt fyrir tjón sem félagið ber vegna brunans sem varð í Miðhrauni 4 í síðustu viku.