Veitingahúsamarkaðurinn er ekki galopinn eins og hann var, að mati Óla Más Ólasonar, eiganda nokkurra veitingahúsa í miðbæ Reykjavíkur.
Fer fjölgun og fækkun matargesta að miklu leyti eftir sveiflum í ferðaþjónustunni. Telur hann að gestum fari nú fækkandi, en þeim fór ört fjölgandi á árunum 2012-2015.
Annar veitingamaður, Ólafur Örn Ólafsson, segir í Morgunblaðinu í dag, að þeir sem hafi þekkingu á veitingastaðarekstri séu líklegri til að lifa af á markaðnum eins og hann er í dag. Þá geti verðlagning skipt miklu máli. Einnig hafi ferðahegðun breyst að einhverju leyti og finni þeir fyrir því að ferðamenn kaupi í auknum mæli ódýrari mat og mat í lágvöruverslunum.
Bransinn hefur verið að barma sér yfir stöðunni veit ég, markaðurinn er líklegast mettur,“ segir Ólafur.
Veitingastöðum hefur fjölgað síðustu ár. Fjörutíu veitingahús eru á Laugaveginum, frá Bankastræti upp að Hlemmi, samkvæmt úttekt Morgunblaðsins. Eru þau jafn fjölbreytileg og þau eru mörg. Þar finnst einnig fjöldi kaffihúsa og bara sem ekki voru taldir með.