Bandaríska verslunarkeðjan Sears, sem eitt sinn var stórveldi, hefur óskað eftir greiðslustöðvun. Saga Sears nær aftur til ársins 1886. Fyrirtækið var frumkvöðull á sviði vöruhúsaverslunarreksturs og rak verslanir víða í Norður-Ameríku. En undanfarin ár hefur hundruðum verslana verið lokað á sama tíma og verslunarkeðjur hafa lent undir í baráttunni við vefverslanir eins og Amazon.
Móðurfélag Sears, Sears Holdings Corporation, sendi frá sér tilkynningu um að að fyrirtækið hafi óskað eftir greiðslustöðvun fyrir dómi í New York. Fjárhagsstaða félagsins er afar bág og getur Sears ekki greitt lán sem átti að greiða í dag. Greiðslan í dag er upp á 134 milljónir Bandaríkjadala.
Edward S. Lampert, stjórnarformaður Sears Holdings, segir að með því að óska eftir greiðslustöðvun (chapter 11) gefist stjórnendum fyrirtækisins möguleiki á að styrkja efnahagsreikning fyrirtækisins.
Alls verður 142 verslunum Sears, sem hafa skilað tapi, lokað fyrir árslok en áður hafði verið tilkynnt um að 46 verslunum yrði lokað í nóvember. Lampert mun láta af starfi forstjóra og stjórnskipulagi Sears breytt. Hann mun hins vegar halda áfram sem stjórnarformaður.