Bindingarhlutfall úr 20% í 0%

Breytingar á lögum um gjaldeyrismál og lögum um meðferð krónueigna sem eru háðar sérstökum takmörkunum, sem Alþingi samþykkti nýverið, tóku gildi í dag.

Vegna breytinganna áformar Seðlabankinn að setja nýjar reglur um bindingu reiðufjár vegna nýs innstreymis erlends gjaldeyris og reglur um meðferð krónueigna sem háðar eru sérstökum takmörkunum. Þar á meðal eru reglur sem fela í sér að lækkun bindingarhlutfalls frá eldri reglum fer úr 20% í 0% en gert er ráð fyrir að þessi breyting taki gildi 6. mars.

Þetta kemur fram í tilkynningu frá fjármála- og efnahagsráðuneytinu.

Lækkun bindingarhlutfallsins markar kaflaskil í beitingu hinnar sérstöku bindiskyldu á fjármagnsinnstreymi á skuldabréfamarkað og í hávaxtainnstæður sem var sett á í júní 2016, að því er segir í tilkynningunni.

Með framangreindum breytingum á lögum um gjaldeyrismál og lögum um meðferð krónueigna sem háðar eru sérstökum takmörkunum er sérstakur aflandskrónumarkaður ekki lengur til staðar og þau fjármagnshöft sem innleidd voru í nóvember 2008 hafa nú nánast að öllu leyti verið losuð.

• 1 blogg um fréttina

Bloggað um fréttina

• Páll Vilhjálmsson: Krónan gengisfellir Samfylkingu