Sádi-arabíska lággjaldaflugfélagið Flyadeal hefur hætt við að kaup á 30 Boeing 737 MAX-flugvélum vegna tveggja flugslysa Boeing síðustu mánuði þar sem 346 fórust.
Flugvélarnar sem hröpuðu voru báðar af gerðinni MAX 737. Fyrra slysið varð í Indónesíu í október og það síðara í Eþíópíu í mars.
Max-farþegaþoturnar voru kyrrsettar eftir slysið í mars og hefur flugvélaframleiðandinn Boeing unnið að úrbótum sem fullnægja öryggissjónarmiðum.
Fram kemur í frétt BBC að Flyadeal snúi sér að helsta keppinauti Boeing, flugvélaframleiðandanum Airbus, og muni kaupa 30 A320-vélar frá þeim. Flydeal er í eigu ríkisrekna flugfélagsins Saudi Arabian Airlines.
Engin dagsetning hefur verið gefin út um það hvenær MAX-vélarnar hefji sig aftur til flugs.