Heimkaup sektuð um 400.000 krónur

Neytendastofa hefur sektað fyrirtækið Heimkaup um 400.000 krónur vegna auglýsinga á svokölluðum „tax free“ afslætti í tilefni 17. júní en þar láðist fyrirtækinu að gefa upp afsláttarhlutfallið, 19,35%.

Fyrirtækið bar fyrir sig að um mistök hefði verið að ræða og því sé kunnugt um að geta beri þess í auglýsingum hvert afsláttarhlutfallið er. Neytendastofa hefur áður þurft að gera athugasemdir við að afslátturinn sé ekki tiltekinn í auglýsingum fyrirtækisins og greiddi þá 200.000 krónur í sekt.

Í ljósi þess telur Neytendastofa nauðsynlegt að sekta félagið að nýju og er sektin tvöföld á við síðast, 400.000 krónur.

Meintur skattaafsláttur (e. tax free) felst í því að fyrirtækið lækkar verð um sem nemur virðisaukaskatti, og er útsöluverðið því það sama og ef varan væri seld í fríhöfn. Á flestum varningi, þó ekki matvælum, er 24% virðisaukaskattur lagður ofan á vöruverð, og samsvarar afslátturinn því að vara sé seld á 100 krónur sem annars kostaði 124 krónur. Jafngildir hann því 19,35% á flestum vörum. Ríkissjóður fær þó vitanlega sinn skerf eftir sem áður, og er afslátturinn alfarið á kostnað seljanda.

Frétt af mbl.is

Heimkaup sektað um 150.000 kr.

• Blogga um frétt