Dregið úr þörf eftir íbúðarhúsnæði

Dregið hefur verulega úr þörf eftir íbúðarhúsnæði frá því sem var. Engu að síður er enn uppsöfnuð þörf eftir íbúðum og óvíst hvort þær íbúðir sem eru í byggingu henti þeim sem helst vantar húsnæði.

Þetta kom meðal annars fram í máli Sigrúnar Ástu Magnúsdóttur, framkvæmdastjóra greininga- og áætlanasviðs Íbúðalánasjóðs á Húsnæðisþingi í vikunni. Benti hún á að meðalstærð íbúða hefði að jafnaði farið minnkandi undanfarin ár í kjölfar þess að ákveðnum hápunkti hefði verið náð í kringum bankahrunið.

Sigrún Ásta sagði að það vantaði 3.900 hagkvæmar íbúðir í stærð og verði inn á markaðinn á næstu árum umfram það sem þegar væri verið að byggja. Greining Íbúðalánasjóðs á síðasta ári hefði sýnt að óuppfyllt íbúðaþörf hafi numið á bilinu 5 — 8.000 íbúðum. Endurskoðuð greining sjóðsins sýndi að uppsöfnuð þörf eftir íbúðarhúsnæði væri nú um 3.900 — 6.600 íbúðum á landsvísu.

Þetta þýddi þó ekki að þúsundir fjölskyldna væru á götunni eða í algjöru íbúðahraki á meðan. Ungt fólk byggi hins vegar til dæmis lengur í foreldrahúsum en áður og nokkuð væri um um að fólk byggi í óskráðu húsnæði. Horft fram til ársins 2023 mætti ætla að þá yrði þörf eftir húsnæði um 2.200 íbúðir á ári.

• Blogga um frétt