Efnahagshorfur Íslands hafa versnað eftir nokkurra ára góðæri, að því er fram kemur í árlegri skýrslu Alþjóðagjaldeyrissjóðsins um íslenskt efnahagslíf sem var birt í dag.
Sjóðurinn gerir reglubundnar úttektir á efnahagslífi aðildarlanda sinna á grundvelli fjórðu greinar stofnsáttmála.
Fram kemur að atvinnuleysi hafi aukist og dregið hafi úr neyslu í kjölfar fækkunar ferðamanna. Aðhald í ríkisfjármálum og gjaldeyrismálum hafi þó heldur dregið úr högginu.
Sjóðurinn spáir því að ríkisfjármál verði í jafnvægi á næsta ári og að hagvöxtur verði hóflegur. Þó eru ýmsir óvissuþættir tilgreindir eins og áhrif útgöngu Breta úr Evrópusambandinu, spenna í alþjóðaviðskiptum og enn frekari fækkun ferðamanna hér á landi.
Auk þess telur sjóðurinn að pressa gæti myndast vegna þess að Ísland var sett á gráan lista vegna peningaþvættis.