Gengi hlutabréfa í fyrirtækjum sem skráð eru í Kauphöll Íslands lækkaði talsvert í dag. Alls nam lækkunin tæplega 3,7%, en gengi allra skráðra félaga lækkaði. Heildarmarkaðsvirði félaganna lækkaði því um 42 milljarða króna, en vísitalan hefur ekki lækkað eins mikið á einum degi frá því um mitt ár 2018.
Mest var lækkunin hjá Icelandair, eða ríflega 8,7%, og stendur verð bréfanna nú í 7,73 kr. Þá voru mikil viðskipti með hlutabréf Arion banka og Marels, en samtals námu viðskiptin rétt tæplega tveimur milljörðum króna. Nam lækkun beggja félaga rétt ríflega 3,6%, og stendur gengi hlutabréfa Arion banka nú í 83,9 kr. og Marel 587 kr.
Gengislækkanir dagsins eru í takt við lækkanir hlutabréfavísitalna erlendis. Rekja má lækkunina til útbreiðslu og hugsanlegra áhrifa kórónuveirunnar, en talsverðar lækkanir hafa verið á mörkuðum um heim allan.