Breyttur afgreiðslutími í útibúum á landsbyggðinni

Landsbankinn hefur ákveðið að gera tímabundnar breytingar á afgreiðslutíma í hluta af útibúum bankans á landsbyggðinni. Þá verður Vesturbæjarútibúi í Reykjavík lokað tímabundið en hraðbankar í útibúinu verða áfram aðgengilegir allan sólarhringinn.

Breytingarnar taka gildi að morgni 18. mars 2020. Afgreiðslutími er styttur í útibúum bankans á eftirfarandi stöðum og verða þau opin frá kl. 10-15 í stað 9-16.

• Akranes
• Snæfellsnes
• Ísafjörður
• Sauðárkrókur
• Húsavík
• Akureyri
• Dalvík
• Egilsstaðir
• Reyðarfjörður
• Höfn í Hornafirði
• Selfoss
• Hvolsvöllur
• Vestmannaeyjar
• Grindavík
• Reykjanesbær

Afgreiðslutími í útibúum á höfuðborgarsvæðinu, fyrir utan Vesturbæjarútibú sem verður lokað tímabundið, er óbreyttur.

Þar sem afgreiðslutími er styttur mun starfsfólk vinna á tveimur vöktum og getur þjónusta því tekið lengri tíma en venjulega. Tilgangurinn með þessum breytingum er að draga úr líkum á að útbreiðsla COVID-19 hafi veruleg áhrif á þjónustu við viðskiptavini og tryggja samfellu í rekstri bankans. Með lokun Vesturbæjarútibús gefst meiri tími til að svara erindum sem berast með tölvupósti, í netspjalli og síma en slíkum erindum hefur fjölgað mikið að undanförnu. Þetta kemur fram í tilkynningu frá Landsbankanum.

Vegna útbreiðslu COVID-19 eru viðskiptavinir vinsamlegast beðnir að nýta sér stafræna þjónustu bankans ef þess er kostur fremur en að koma í útibú. Í flestum tilvikum er engin þörf á að fara í útibú til að fá bankaþjónustu því hægt er að framkvæma helstu aðgerðir og fá ýmiss konar þjónustu með síma og tölvu að vopni.

• Blogga um frétt