Ákveðið hefur verið að framlengja hlé á gjaldeyriskaupum lífeyrissjóða til erlendra fjárfestinga um þrjá mánuði, eða til 17. september. Tilgangurinn er að bregðast við miklum samdrætti útflutningstekna vegna heimsfaraldurs kórónuveiru og mögulegum þrýstingi á gengi krónunnar vegna hans.
Í samráði við Seðlabankann gerðu lífeyrissjóðir hlé á gjaldeyriskaupum 17. mars sl. „Ljóst er að þetta hlé hefur gegnt veigamiklu hlutverki í að viðhalda þjóðhagslegum stöðugleika í gegnum þær holskeflur sem hafa skollið á þjóðarskútunni síðustu 3 mánuði,“ segir Ásgeir Jónsson seðlabankastjóri í tilkynningu á vef Seðlabankans.
Undanfarin ár hefur Ísland breyst úr því að vera fjármagnsinnflytjandi með þrálátan viðskiptahalla í fjármagnsútflytjanda með drjúgan viðskiptaafgang. Þessi viðsnúningur stafar að miklu leyti af þeim sparnaði sem verður jafnt og þétt til í lífeyriskerfinu og hefur skapað nýjar forsendur til þess að viðhalda þjóðhagslegum stöðugleika, segir Ásgeir einnig.