„Sveitarstjórnin vildi vera með í ráðum frá upphafi um það hvers lags bygging risi þarna. Fyrstu drög frá Loo samrýmast stefnu sveitarstjórnar og fólki líst almennt vel á þessi áform,“ segir Haraldur Birgir Haraldsson, skipulags- og byggingarfulltrúi Rangárþings ytra.
Áform malasíska athafnamannsins Loo Eng Wah um uppbyggingu ferðaþjónustu á Hellu eru nú farin að taka á sig mynd. Morgunblaðið hefur greint frá uppbyggingu sem hann hefur staðið fyrir á Leyni 2 og 3 í Landsveit.
Áform hans þar hafa verið umdeild og hefur Loo þurft að breyta þeim vegna andstöðu hagsmunaaðila á svæðinu. Í byrjun þessa árs fékk hann úthlutaðar tvær atvinnulóðir á besta stað á Hellu. Annars vegar er um að ræða lóð við bakka Rangár og hins vegar við Miðvang, gegnt skrifstofu sveitarfélagsins og miðstöð þjónustu þar. Þeirri lóð hefur verið lýst sem „andliti Hellu“.