Magnús Lárusson, eða Maggi Lár eins og hann er jafnan kallaður, og Páll Ingólfsson opnuðu nýverið golfbúðina Prósjoppuna í Síðumúla 33. Prósjoppan er frábrugðin öðrum golfverslunum að því leyti að þar eru bara seld tvö vörumerki; Titleist og FootJoy. „Titleist er mjög framarlega og FJ er m.a. þekkt fyrir góða golfskó og hanska. Þeir hafa sótt fram af ævintýralegum hraða í golffatnaði,“ segir Magnús í samtali við ViðskiptaMoggann.
Hann segist hafa haft nafnið á versluninni í kollinum síðustu fjögur ár. „Maður fer alltaf í svona prósjoppur í útlöndum. Mér fannst þetta mjög viðeigandi fyrir búðina okkar. Kylfingar eru mjög sáttir og ég hef fengið mikið hrós fyrir nafnið,“ segir Magnús.
Búðin hóf starfsemi á netinu 05.05.20 eins og Magnús útskýrir, en var opnuð í Síðumúlanum 20.05.20. „Það er gott að muna svona dagsetningar.“
Maggi er enginn nýgræðingur á golfsviðinu. Hann var áður vörumerkjastjóri fyrir Titleist og FJ hjá heildversluninni ÍSAM, ásamt því að vera fyrrverandi atvinnumaður í golfi. „Ég er með +2 í forgjöf. Páll er með rúmlega 9.“
Hann segir að kostur þess að vera með aðeins tvö vörumerki sé að hægt sé að bjóða mjög gott úrval.
„Hér færðu allt í einni ferð.“
Maggi segir að níu ár séu síðan golfbúð hafi síðast verið opnuð á Íslandi. „Miðað við uppgang íþróttarinnar var þetta löngu tímabært.“
Hann segir að viðtökur hafi verið mjög góðar. „Við erum mjög sáttir við byrjunina og höfum fengið töluvert marga viðskiptavini sem koma aftur og aftur.“