Hundraða milljóna sala stjórnenda Kviku

Stjórnendur Kviku banka hf. hafa í dag selt hlutabréf fyrir hundruð milljóna króna í bankanum, en bankinn birti uppgjör sitt fyrir fyrri árshelming í morgun. 

Frétt af mbl.is

Kvika hagnaðist um fimm milljarða

Baldur Stefánsson forstöðumaður fyrirtækjaráðgjafar, Marinó Örn Tryggvason forstjóri og Ragnar Páll Dyer framkvæmdastjóri fjármálasviðs seldu allir fjórar milljónir hluta á genginu 23,5 kr. á hlut, eða hver fyrir 94 milljónir króna. 

Baldur Stefánsson.

Marinó Örn Tryggvason.

Ragnar Páll Dyer.

Sigurður Viðarsson forstjóri TM trygginga seldi þrjár milljónir hluta á sama gengi, fyrir 70,5 milljónir króna.

Sigurður Viðarsson. mbl.is/Hari

Lilja Rut Jensen yfirlögfræðingur bankans seldi tvær milljónir hluta á sama gengi, að andvirði 47 milljóna króna. 

Lilja Rut Jensen.

Óskar B. Hauksson framkvæmdastjóri fjámála- og rekstrarsviðs TM trygginga seldi eina milljón hluta á sama gengi fyrir 23,5 milljónir króna.

Óskar B. Hauksson.

Samtals nemur sala stjórnendanna 423 milljónum króna. 

Keyptu á mun lægra gengi

Stjórnendur fyrirtækisins nýttu sér einnig áskriftarréttindi til kaupa á bréfum í félaginu. Þannig keypti Ármann Harri Þorvaldsson aðstoðarforstjóri Kviku fimm milljónir hluta á genginu 7,16 en hann á rúmlega fimm milljónir hluta í bankanum eftir kaupin. Hann á sömuleiðis áskriftarréttindi að öðrum 9,6 milljón hlutum. Markaðsvirði hlutanna sem keyptir voru í dag á 35,8 milljónir króna, er 116,5 milljónir króna, miðað við lokagengi Kviku í Kauphöll Íslands -  23,3 krónur á hvern hlut.

Ármann Harri Þorvaldsson. mbl.is/Haraldur Jónasson/Hari

Baldur Stefánsson keypti 2,5 milljónir hluta á sama gengi en hann á 2,7 milljónir hluta í bankanum eftir kaupin. Markaðsvirði hlutanna sem Baldur keypti í morgun er ríflega 58 milljónir króna.

Hannes Frímann Hrólfsson framkvæmdastjóri Kviku eignastýringar hf. keypti fjórar milljónir hluta á sama gengi, en eftir kaupin á hann rúmlega fjórar milljónir hluta í bankanum og áskriftarréttindi að öðrum níu milljón hlutum. Markaðsvirði hlutanna sem keyptir voru í morgun er 93,2 milljónir króna.

Hannes Frímann Hrólfsson. Árni Sæberg

Lilja Rut keypti 1,3 milljónir hluta á sama gengi en hún á rúmlega 1,4 milljónir hluta eftir viðskiptin. Markaðsvirði hinna keyptu hluta er ríflega 30 milljónir króna.

Marinó Örn nýtti einnig áskriftarréttindi og keypti ríflega 3,3 milljónir hluta á genginu 7,16 og á eftir viðskiptin rúmlega 3,4 milljónir hluta. Hann á einnig áskriftarréttindi að rúmlega 7,3 milljónum hluta. Markaðsvirði hlutanna sem Marinó keypti er tæplega 78 milljónir króna.

Ólöf Jónsdóttir framkvæmdastjóri rekstrar og þróunar keypti einnig hluti í bankanum í dag. Hún nýtti áskriftarréttindi sín til að kaupa 1,3 milljónir hluta og á eftir kaupin rétt á kaupum á 2,5 milljón hlutum til viðbótar.  Markaðsvirði hinna nýkeyptu hluta er um 30 milljónir króna.

Ólöf Jónsdóttir.

Ragnar Páll nýtti sér sömuleiðis áskriftarréttindi sín og keypti 2,5 milljónir hluta á sama gengi og hinir stjórnendurnir. Markaðsvirði hinna nýju hluta er ríflega 58 milljónir króna.

Eftir viðskiptin á Ragnar rétt á kaupum á 6,5 milljón hlutum til viðbótar.

Gengið lækkaði í dag

Gengi bréfa fyrirtækisins í Kauphöll Íslands lækkaði um 2,1% í dag í tæplega 1,7 milljarðs króna viðskiptum. Lokagengið er, eins og fram kom hér að ofan, 23,3 krónur hver hlutur.

• Blogga um frétt