Viðskipti | Viðskipti | mbl | 14.4.2022 | 14:59 | Uppfært 17:12

Fáir hafa selt hlut sinn í Íslandsbanka eftir útboðið

Eggert Jóhannesson

Fá dæmi eru um að aðilar sem tóku þátt í útboði Bankasýslunnar á hlut ríkisins í Íslandsbanka þann 22. mars sl. hafi minnkað eignarhlut sinn eftir útboðið eða selt hlut sinn alfarið.

Nokkuð hefur verið fjallað um fjárfestingu íslenskra aðila í útboðinu sem hafa verið áberandi í atvinnulífinu hér á landi og fluttar af því fréttir að viðkomandi aðilar hafi selt hlut sinn, ýmis að hluta eða í heild, að útboðinu loknu. Morgunblaðið hefur þó fengið staðfest frá nokkrum þeirra að svo er ekki.

Þannig má nefna að eignarhaldsfélagið Bóksal, sem var stærsti einkaaðilinn sem tók þátt í útboðinu, með fjárfestingu upp á um 1,2 milljarða, halda enn á sínum hlut. Eigendur Bóksals eru hjónin Bogi Þór Siguroddsson og Linda Björk Ólafsdóttir, sem eru jafnframt eigendur heildsölunnar Johan Rönning.

Fjárfestingafélagið Kristinn, sem er í eigu Guðbjargar Matthíasdóttur og fjölskyldu, oft kennd við Ísfélag Vestmannaeyja, heldur enn á sínum hlut en félagið fjárfesti fyrir um 470 milljónir króna í útboðinu. Það sama má segja um eignarhaldsfélagið Stein, sem er í Þorsteins Más Baldvinssonar, forstjóra Samherja, og fv. eiginkonu hans, sem fjárfesti fyrir um 300 milljónir króna.

Tvö félög í eigu Þórðar Más Jóhannessonar, fyrrverandi stjórnarformanns Festar, fjárfestu í útboðinu fyrir um 108 milljónir króna. Í samtali við Innherja á visir.is staðfestir Þórður Már að hann hafi ekki selt þá hluti.

Hlutirnir í geymslu annarra fjármálafyrirtækja

Þetta eru nokkur dæmi um þau félög og einstaklinga sem fjallað hefur verið um síðustu daga, m.a. í umræðu á vettvangi stjórnmála. Í þessum tilvikum, og mörgum fleiri, eru hlutabréfin í bankanum vistuð hjá öðrum fjármálafyrirtækjum, bæði bönkum og verðbréfafyrirtækjum, og því er eignarhlutur þeirra ekki sjáanlegur á hluthafalista Íslandsbanka.

Bankasýsla ríkisins birti fyrr í dag upplýsingar um samanburð á hluthafalista Íslandsbanka og niðurstöðu fagfjárfestaútboðs. Þar kemur fram að 25 fjárfestar hafi aukið við eignarhlut sinn í bankanum eftir útboðið og að samanlagður eignarhlutur þeirra sé tæplega 29% ef miðað er við hluthafa lista frá 11. apríl.

Fram kemur að 87 fjárfestar séu með óbreyttan eignarhlut og fari með um 10% hlut í bankanum, en að 34 fjárfestar hafi minnkað eignarhlut sinn að hluta en samanlagður eignarhlutur þeirra sé um 4% af hlutafé bankans.

Þá kemur einnig fram í upplýsingum Bankasýslunnar að 60 fjárfestar birtist ekki á hluthafalista nú, sem geti meðal annars gæti skýrst af því sem hér hefur komið fram, þ.e. að eignarhlutur þeirra sé í vörslu annarra aðila. Þá er vakin athygli á því að hlutafjáreign fjármálastofnana í Íslandsbanka fór úr 0,3% fyrir útboð í 4,1% af heildar hlutafé þann 11. apríl. Sú aukning samsvarar um 75% af eignarhlut þeirra fjárfesta sem keyptu í útboðinu en birtast ekki á hluthafalistanum.

Loks kemur fram að fjöldi hluthafa Íslandsbanka hafi verið 15.304 þann 11. apríl og að þeim hafi fjölgað um 125 frá útboðsdegi.