„Fyrst og fremst kjánalegt“
Setja bókamerki
Gísli Halldór Halldórsson, bæjarstjóri Ísafjarðarbæjar, ætlar ekki að biðja nefndarmenn í starfshópi sjávarútvegs- og landbúnaðarráðherra um stefnumörkun í fiskeldi afsökunar vegna ummæla sem hann lét falla á bæjarstjórnarfundi 24. ágúst. Hann segir að viðbrögð nefndarmannanna, sem hafa krafist opinberrar afsökunar Ísafjarðarbæjar, hafi komið sér á mjög á óvart.
Veit ekki hver gerði hvað
Í bréfi nefndarmanna til bæjarstjórnar, forseta bæjarstjórnar og formanns bæjarráðs segir að í ummælum bæjarstjóra hafi falist „gróf og ósönn ásökun“ um að fulltrúi veiðiréttarhafa og fulltrúar laxeldisfyrirtækjanna hafi sýnt af sér óheilindi og óheiðarleika í störfum sínum.
„Ég var búinn að fá veður af því að þetta stæði til. Þess vegna var ég búinn að hlusta aftur á ræðu mína sem er hægt að nálgast á Facebook-síðu Ísafjarðarbæjar. Ég segi auðvitað ekki neitt um óheilindi og óheiðarleika og ég veit svo sem ekki hver gerði hvað í því sem ég kalla hrossakaup og plott,“ segir Gísli Halldór í samtali við mbl.is.
Fleiri í nefndinni gátu stýrt „plottinu“
Hann kveðst ekki hafa gert sér grein fyrir því að ræðan myndi vekja eins hörð viðbrögð hjá nefndarmönnunum sem skrifa undir bréfið og raun ber vitni, því fleiri í nefndinni hafi verið þess megnugir að stýra því sem hann kallar plott.
„Reyndar nær þessi atburðarrás öll út fyrir nefndina. Áhættumatið er búið til með ákveðnum hætti og nálgunin á því. Ég ítreka það að ég hef ekkert sagt um hver hafi sýnt óheilindi og óheiðarleika en ég kalla þessa atburðarrás plott og hrossakaup þó svo að engir hestar hafi skipt um eigendur.“
Ekki á ábyrgð bæjarstjórnar
Hann bendir á að fjölmiðlar hafi haft það eftir fulltrúa veiðirétthafa í nefndinni þegar hann „rauk út af fundi og neitaði að skrifa undir“ að náðst hefði ákveðið samkomulag sem laxeldisfyrirtækin væru að brjóta með því að ætla að koma með bókun.
„Menn geta kallað þetta annað en hrossakaup en svona sá ég þetta. Mig langar að taka sérstaklaga fram að mér finnst orð mín á fundi bæjarstjórnar í beinni útsendingu alls ekki geta verið á ábyrgð bæjarstjórnar. Það er í raun og veru ákaflega kjánalegt að reyna að halda því fram.“
Muntu því ekki draga ummæli því til baka og biðjast afsökunar?
„Nei, þá fyrst væri ég farinn að ljúga ef ég væri tilbúinn til þess,“ svarar Gísli.
Tekið fyrir á mánudag
Hann reiknar með því að fjallað verði um bréf nefndarmannanna á fundi bæjarráðs næstkomandi mánudag. „En ég hlýt að bera sjálfur fulla ábyrgð á þessum orðum og það gerir enginn fyrir mig, hvorki BB [Bæjarins besta] né bæjarstjórn.“
Í bréfinu er farið fram á afsökunarbeiðni frá Ísafjarðarbæ innan fjórtán daga. Ef hún berst ekki áskilja nefndarmenn sér rétt til að fá ummæli bæjarstjóra ómerkt með öðrum tiltækum úrræðum. Spurður segir Gísli þessar kröfur ekki vera harkalegar.
„Mér finnst þetta fyrst og fremst kjánalegt en það er augljóst að einhver hefur komið við viðkvæman punkt.“
Vendingar vestanhafs geti haft áhrif hér heima
Tveir í haldi grunaðir um mansal og smygl á fólki
Eina leiðin var að fella björninn
Björninn sagður nálægt byggð
Glæpastarfsemi orðin mun skipulagðari
Algeng laun 1,4 til 2,2 milljónir
Davíð Viðarsson var skyndihugdetta