Jóhann Kristinsson gefur út sína fyrstu plötu

Út er komin á Íslandi platan Call Jimmy, eftir Jóhann Kristinsson.

Að sögn Jóhanns er um acoustic/folk/lo-fi-tónlist að ræða á þessu 14 laga verki. „Lögin eru flest á ensku, utan eitt lag sem er á íslensku. Þá eru tvö lög án söngs,“ segir Jóhann, sem spilar á flest hljóðfærin sjálfur.

„Ég spila á gítar, bassa, trommur, sílafón, afríkuorgel og skemmtara, en vinur minn Þórður Hermannsson spilar á selló,“ segir Jóhann, sem hefur ekki náð tökum á knéfiðlunni enn.

Fyrst útgefinn í Chicago

„Vinkona mín vann hjá útgáfufyrirtækinu fyrir nokkrum árum og setti sig í samband við sína gömlu yfirmenn. Þeim leist vel á lögin og voru til í að gefa þetta út. Það er um að gera að nýta sér öll sambönd,“ segir Jóhann, en diskurinn kom fyrst út vestanhafs og á netinu.

Jóhann er maðurinn á bak við tónlistina í stuttmyndinni Hux, sem valin var besta stuttmyndin á Stuttmyndadögum Reykjavíkur fyrir skemmstu og verður send til Cannes til úrslita. Hann hefur enga tónlistarmenntun, þótt krókurinn hafi bognað snemma. „Bróðir minn átti trommusett þegar ég var 10 ára og ég lamdi það duglega. Síðan gaf mamma mér nælonstrengjagítar þegar ég var 12 ára, og eftir það varð ekki aftur snúið.“

Útgáfutónleikar verða á Kaffi Rósenberg hinn 24. september.