Sænska forsætisráðherranum sýnt vatnsbyssutilræði

Sænska leyniþjónustan hefur lagt fram kæru vegna vatnsbyssuárásar sem gerð var á Fredrik Reinfeldt forsætisráðherra Svía fyrir utan kvikmyndahús í Stokkhólmi í gærkvöldi. Samkvæmt sænskum fjölmiðlum athugar nú saksóknari hvort fylgja beri eftir kæru á hendur starfsmanni Strix Television sem sprautaði vatninu.

Leyniþjónustan, Säpo, lítur árásina alvarlegum augum sérstaklega með tilliti til fyrri árása á sænska ráðherra.

Sjónvarpsfólkið sprautaði vatninu á Reinfeldt er hann fór með syni sína tvo á frumsýningu kvikmyndarinnar Pirates of the Caribbean fyrir utan Rigoletto kvikmyndahúsið í miðborg Stokkhólms í gærkvöldi.

„Við sjáum ekki alveg glensið í þessu,” sagði blaðafulltrúi forsætisráðherrans í samtali við Svenska Dagbladet.

Sjónvarpsfólkið var á vegum SVT sjónvarpsstöðvarinnar sem hefur sent frá sér tilkynningu þar sem beðist er afsökunar á „tilræðinu” og þar kemur fram að myndefnið verður ekki sent út. Strix Television hafa framleitt grínþætti þar sem þeir sprauta vatni á frægt fólk, hafa til dæmis sprautað vatni á söngkonuna Carolu og fleiri fræga Svía.

Þættirnir munu vera gerðir að breskri fyrirmynd nema að Svíarnir eru vænni en Bretar að því leyti að þeir nota vatn en ekki blek.

• 3 blogg um fréttina

Bloggað um fréttina

• Sigurjón Sveinsson: Þvílík smekkleysa!
• Sigríður Sigurðardóttir: Blávatn hættulegt?
• Benedikt Halldórsson: "Aldrei að kasta nokkru á stjórnmálamenn nema kveðju"