Forsætisráðherraskipti í Danmörku

Forsætisráðherraskipti verða í Danmörku í dag en Anders Fogh Rasmussen mun ganga á fund Margrétar Danadrottningar klukkan 11:30 og óska eftir lausn frá embætti vegna þess að hann mun í sumar taka við stöðu framkvæmdastjóra NATO.

Lars-Løkke Rasmussen, varaformaður Venstre, mun klukkutíma síðar ganga á fund drottningar og verða settur í embætti forsætisráðherra Danmerkur. Hann mun áfram stýra minnihlutastjórn Venstre og Íhaldsflokksins, sem nýtur stuðnings Danska þjóðarflokksins.

Lene Espersen, leiðtogi Íhaldsflokksins, átti fund með Fogh Rasmussen í morgun og sagði á eftir, að Lars Løkke Rasmussen sé afar góður kostur í embætti forsætisráðherra.

Lars Løkke Rasmussen  er 45 ára að aldri, lögfræðingur að mennt. Hann hefur setið á danska þinginu frá árinu 1994 og í núverandi ríkisstjórn frá því hún var mynduð 2001, fyrst sem heilbrigðisráðherra en síðan sem fjármálaráðherra.  Eiginkona hans, Sólrun Jákupsdóttir Løkke Rasmussen, er frá Færeyjum og starfar sem kennari.

• 1 blogg um fréttina

Bloggað um fréttina

• Stefán Friðrik Stefánsson: Fogh hættir og fer til NATO - Løkke tekur við