Trúður út í geim

Kanadískur milljarðamæringur, Guy Laliberte, sem stofnaði fjölleikahúsið Cirque du Soleil, lagði í morgun af stað til alþjóðlegu geimstöðvarinnar.  Laliberte er farþegi í rússnesku Sojus-geimfari sem skotið var á loft frá Kasakstan. Með í för er bandaríski geimfarinn Jeffrey Williams og rússneski geimfarinn  Maxim Surayev.

Laliberte, sem er fimmtugur, mun dvelja í geimstöðinni í tæpan hálfan mánuð.  Ekki er ljóst hvað hann greiddi fyrir farmiðann út í geim en síðasti geimferðamaðurinn, sem fór til geimstöðvarinnar, greiddi 35 milljónir dala, jafnvirði 4,4 milljarða króna.

Laliberte, sem er fyrrum eldgleypir og trúður, tók níu rauð trúðanef með sér út í geim og sagðist einnig ætla að taka með sér kímnigáfuna. „Það er allstaðar rúm fyrir húmor," sagði hann.

Laliberte er sjöundi geimferðamaðurinn, sem tekur sér far með rússnesku geimfari til alþjóðlegu geimstöðvarinnar. 

Geimfarinu var skotið á loft frá Baikonur geimferðastofnuninni í Kasakstan í morgun. Reuters

• 2 blogg um fréttina

Bloggað um fréttina

• Hulda Elma Guðmundsdóttir: One way ticket to ...
• Ólafur Ragnarsson: Nóg til !!!!!