Björgunarmenn á Haiti eru að reyna að ná manni úr rústum húss í höfuðborginni Port-au-Prince, en þeir telja sig hafa fengið ótvíræð merki um að hann sé á lífi.
„Við höfum fengið jákvæð merki um að það sé lifandi maður í byggingunni,“ sagði bandaríski slökkviliðsmaðurinn John Boyle í samtali við fréttastofu Reuters.
Maðurinn á að hafa sagt að fimm aðrir séu líka á lífi í rústum hótels og stórmarkaðar í höfuðborginni Port-au-Prince. Fyrr í dag sögðu yfirvöld á Haiti að formlegri leit að fórnarlömbum jarðskjálftans hefði verið hætt.
Ellefu dagar eru síðan jarðskjálftinn reið yfir. Búið er að bjarga 132 mönnum úr rústunum.