Vél Ryanair snúið við

Vél írska lággjaldaflugfélagsins Ryanair, sem átti að fljúga frá Belfast á Norður- Írlandi til London, var snúið við vegna olíulyktar í farrýminu. Talsmenn félagsins segja að vélin hafi lent heilu á höldnu.

Tvær vélar flugfélagsins voru kyrrsettar á sunnudag vegna tæknilegra vandamála. Síðar kom í ljós að aska frá Eyjafjallajökli hefði komist í hreyfla vélanna. Ekki liggur fyrir hvort flugvélin, sem var snúið við í dag, sé önnur þessara véla. 

Fram kemur í tilkynningu frá Ryanair að áhöfn vélarinnar hafi fundið olíulykt í farrýminu. Því hafi verið ákveðið að snúa vélinni við og hún lenti á flugvellinum í Belfast klukkan 7:30. Vélin verður nú skoðuð.