Kim Jong-il látinn
Setja bókamerki
Kim Jong-il, leiðtogi Norður-Kóreu, er látinn á sjötugasta aldursári. Hann hafði stjórnað landinu frá því hann tók við af föður sínum, Kim Il-sung, árið 1994. Landsmenn hafa verið hvattir til að fylkja sér um son hans, Kim Jong-un.
Tilkynnt var í morgun um andlátið í norður-kóreska sjónvarpinu. Þula í sorgarklæðum sagði hann hafa látist af völdum of mikillar líkamlegrar og andlegrar vinnu. Hann hafi gengið of nærri sér í störfum og látist í járnbrautarlest í heimsókn í nágrenni höfuðborgarinnar Pyongyang. Ríkisfréttastofan KCNA sagði síðar að banameinið hafi verið hjartaáfall.
Kim hlaut heilablóðfall árið 2008 og sást ekki lengi á almannafæri. Hann hafði útnefnt Kim Jong-un, þriðja son sinn, sem arftaka sinn á valdastóli en hann er á þrítugsaldri. Fréttastofan KCNA hvatti í morgun þjóðina til að sameinast að baki honum.
„Allir flokksmenn, hermenn og alþýðan ættu að fylgja leiðsögn félaga Kim Jong-un af dyggðasemi og vernda og styrkja enn frekar hina sameinuðu forystusveit flokksins, hersins og almennings,“ sagði KCNA.
Útför Kim Jong-il verður gerð í Pyongyang 28. desember og hefur þjóðarsorg verið lýst yfir í landinu til 29. desember.
11 verða í framboði til embættis forseta Íslands
„Jæja, Jón forseti bara mættur“
Óásættanlegt hversu langan tíma viðræður hafa tekið
Fylgið á hreyfingu tvist og bast
Landrisið gæti hafa stöðvast og gosið virðist eflast
Atvinnuhúsnæði ekki keypt upp í Grindavík
„Mjög ánægður með útkomuna“