Erlent | AFP | 6.6.2012 | 20:33 | Uppfært 21:38

Obama fundaði með Evrópuleiðtogum um evrusvæðið

Mario Monti, Angela Merkel og Barack Obama ræddu um mikilvægi þess að styrkja evrusamstarfið. Hér sjást þau á fundi G8 ríkjanna, ásamt David Cameron, forsætisráðherra Bretlands, sem fram fór í Bandaríkjunum í síðasta mánuði. AFP

Barack Obama, forseti Bandaríkjanna, ræddi við Angelu Merkel, kanslara Þýskalands, og Mario Monti, forsætisráðherra Ítalíu, í dag um mikilvægi þess að styrkja evrusvæðið. Þetta segir talsmaður Bandaríkjaforsetans.

„Leiðtogarnir voru sammála um að mikilvægt væri að grípa til aðgerða til að styrkja evrusvæðið og vöxt í Evrópu og á alþjóðavísu,“ segir Jay Carney, talsmaður Hvíta hússins.

Hann bætti við að leiðtogarnir hefðu sammælst um að vera áfram í sambandi vegna málsins fyrir fund G20-ríkjanna, sem fram fer í Mexíkó dagana 18.-19. júní.

Evrópuleiðtogar eru undir miklum þrýstingi að styrkja spænska bankakerfið sem stendur höllum fæti. Menn vilja koma í veg fyrir að fjórða ríkið á evrusvæðinu þurfi að sækjast eftir neyðarláni.

Á sama tíma búa Grikkir sig undir að endurtaka þingkosningarnar í landinu. Margir óttast að niðurstaða kosninganna geti leitt til þess að ekkert verði af því að Grikkir fái afgreitt neyðarlán frá Evrópusambandinu og Alþjóðagjaldeyrissjóðnum og að þeir dragi sig úr evrusamstarfinu.