56 manns hið minnsta hafa drukknað sl. sólarhring eftir að smyglarar skipuðu 300 afrískum flóttamönnum og hælisleitendum að yfirgefa báta sína, skammt undan strönd Jemens.
Þeir sem lifðu sjóferðina af náðu landi í Shabwa-héraði í Jemen að því er fram kemur í tilkynningu frá Alþjóðastofnun innflytjendamála (International Organization for Migration (IOM).
Um 8.300 manns hafa látið lífið í stríðinu í Jemen frá 2015 og milljónir hafa hrakist frá heimilum sínum. Mikill fjöldi hælisleitenda frá fátækari löndum Afríku heldur engu að síður áfram að koma þangað á leið sinni í leit að vinnu í Persaflóaríkjunum.
Að minnsta kosti 6 drukknuðu þegar smyglararnir skipuðu 180 eþíópískum flóttamönnum og hæliseitendum af einum báti og 13 er enn saknað. Flestir þeirra sem í bátnum voru voru börn og ungmenni.
Í gær neyddu smyglarar 120 Sómala og Eþíópíubúa frá borði skammt frá Jemen er afar vont var í sjóinn. 29 drukknuðu og 22 er enn saknað.
Smyglararnir henda fólkinu frá borði til þess að komast hjá handtöku fyrir að smygla fólki. Laurent de Boeck, sendifulltrúi IOM, í Jemen segir áhöfn bátsins hafa haldið samstundis aftur til Sómalíu þar sem þeir tóku fleira fólk um borð og héldu svo áleiðis til Jemens á ný.
Hann sagði aðfarirnar vera „átakanlegar og ómannúðlegar“.
„Þjáningar hælisleitenda á þessari leið eru ótrúlegar. Allt of margt ungt fólk greiðir smyglurunum fyrir falska von um betri framtíð,“ sagði de Boeck.
IOM telur að allt að 55.000 hælisleitendur frá ýmsum Afríkuríkjum hafi haldið til Jemens frá því í upphafi þessa árs og að rúmur helmingur þeirra sé undir 18 ára aldri.