Öryggisráð Sameinuðu þjóðanna mun funda í dag eftir Norður-Kórea skaut eldflaug yfir Japan í kvöld frá höfuðborg landsins, Pyongyang að því er Reuters-fréttastofan greindi frá. Fundurinn er haldinn að beiðni japanskra stjórnvalda, sem hafa fordæmt eldflaugaskotið. Sagðist varnarmálaráðherra Japans telja að stjórnvöld í Norður-Kóreu hafi haft Guam í huga þegar eldflaug var skotið yfir Japan. Hún hafi verið nægjanlega langdræg til þess að hæfa Guam sem er bandarískt yfirráðasvæði.
Eldflaugin náði um 770 km hæð og flaug um 3.700 km leið á 19 mínútum að sögn Yoshihide Suga, talsmanns Japansstjórnar.
Í lok síðasta mánaðar sendi Norður-Kórea á loft meðaldræga eldflaug sem fór 2.700 km leið yfir Japan.
„Vegalengd þessa prófs er mikilvæg af því að með því sýndi Norður-Kórea að hún geti náð til Guam,“ sagði í yfirlýsingu frá samtökum vísindamanna. Ekki liggi hins vegar enn fyrir hversu nákvæmar flaugarnar séu.
Stjórnvöld í N-Kóreu hafa hótað því að skjóta á Guam og hefur forseti Bandaríkjanna, Donald Trump, varað við því að ef það verði gert þá verði svarað af fullum þunga.
Stutt er síðan öryggisráðið herti enn frekar viðskiptaþvinganir í garð Norður-Kóreu vegna kjarnavopna tilrauna þeirra.