Stjórnvöld í Úkraínu segja að rússneskar hersveitir hafi skotið tveimur flugskeytum og sigað 35 árásardrónum á skotmörk víðs vegar um Úkraínu í nótt.
Á sama tíma segjast Rússar hafa skotið niður 21 árásardróna frá Úkraínu í nótt.
Árásardrónar Rússlands voru íranskir að gerð, að sögn úkraínska flughersins. Segjast þeir hafa skotið niður 15 af þeim.
„Óvinurinn stýrði sumum árásardrónunum meðfram framlínusvæðum og reyndi að skjóta á eldsneytis- og orkumannvirki sem og borgaraleg og hernaðarleg mannvirki nálægt framlínunni og landamærum ríkisins að Rússlandi,“ sagði í yfirlýsingu flughers Úkraínu.
Rússnesk loftvarnarkerfi skutu niður 21 úkraínska dróna yfir rússneskum yfirráðasvæðum og Krímskaga, að sögn varnarmálaráðuneytis Rússlands.