Fjölgar á vanskilaskrá

Alls voru 16.086 Íslendingar, 18 ára og eldri, í dag á vanskilaskrá sem fyrirtækið Creditinfo Ísland tekur saman.  Aukning hefur verið á fjölda vanskila á öllum búsetusvæðum en  hæst mælist hlutfall einstaklinga í vanskilum á Reykjanesi.

Á fyrstu níu mánuðum ársins er fjöldi nýskráðra einstaklinga á vanskilaskrá um það bil sá sami og allt árið 2007. Á tólf mánaða tímabili árið 2007 bættust við 3348 einstaklingar 18 ára og eldri á vanskilaskrá. Þetta gerir að meðaltali 279 einstaklinga á mánuði. Á fyrstu níu mánuðum ársins 2008 hafa bæst við 3316 einstaklingar 18 ára og eldri á vanskilaskrá. Þetta gerir að meðaltali 368 einstaklinga á mánuði sem samsvarar ríflega 30% aukningu frá fyrra ári.

Flestir einstaklingar á vanskilaskrá eru á aldrinum 30 – 39 ára, eða samtals 4212 einstaklingar. Creditinfo Ísland mun á næstu vikum sérstaklega vakta vanskilaskráningar hjá þessum aldurshópi auk þess að skoða hvernig þróunin mælist hjá eldri borgurum.  1704 einstaklingar 60 ára og eldri, eru í alvarlegum vanskilum.

Í tilkynningu frá Creditinfo segir, að fyrirtækið vilji, í ljósi þeirra aðstæðna sem nú ríkja í íslensku samfélagi, leggja sitt af mörkum til að upplýsa helstu ráðuneyti og ráðamenn sem best um stöðu almennings og fyrirtækja sem nú stefna í alvarleg vanskil eða gjaldþrot. Lögð verði áhersla á að upplýsa félagsmálaráðuneytið sem best um stöðu fjölskyldufólks og eldri borgara með því að vakta og mæla sérstaklega hvernig vanskil eru að þróast hjá þessum hópum næstu vikurnar.

• 4 blogg um fréttina

Bloggað um fréttina

• Björn Finnbogason: Fáránleikinn er algjör!
• Einar Vignir Einarsson: Fólk er rifið niður. En hvernig er með þá sem...........
• Reynir Andri: Þið getið fundið kona mína með því að skulda ykkur …
• Magnús Helgi Björgvinsson: Taktlaust tal hjá lífeyrissjóðum!!