„Við bjuggumst ekki frekar en aðrir við svo miklum niðurskurði.“ segir Kristín Völundardóttir, sýslumaður á Ísafirði, en fjárveiting til embættisins fyrir árið 2009 verður skorin niður um 14,3 milljónir króna, fer úr 232,8 milljónum í 218,5 milljónir.
„Ég hef tekið þá
ákvörðun að lækka eigin laun, yfirlögregluþjónn og
aðstoðaryfirlögregluþjónn hafa einnig samþykkt launalækkun. Síðan er ég
í viðræðum við starfsmenn, það er bara ekki komið að þessu enn. Ég er
búin að senda tölvupóst á alla starfsmenn þar sem ég tjái þeim að ég
lækki laun mín til samræmis við aðra,“ segir Kristín. Hún segist ekki
ætla að lækka grunnlaun lögreglumanna á Vestfjörðum.
„Föst
yfirvinna hjá lögreglumönnum verður skert og sömuleiðis aðgangur þeirra
að yfirvinnu en ég hreyfi ekki við grunnlaunum,“ segir Kristín. Hún
vonast til að þessar aðgerðir nægi til að draga úr þessu áfalli sem
fylgir niðurskurðinum og er stefnan að ekki þurfi að segja upp
lögreglumönnum.