Allharða gagnrýni er að finna í umsögn Seðlabankans til fjárlaganefndar um Icesave-samningana, sem nefndinni var kynnt í gær.

Í lögfræðilegu áliti kemur m.a. fram að ekki hafi verið leitað til lögfræðinga Seðlabankans við samningsgerðina, en samningar um Icesave voru undirritaðir 5. júní sl. Lögfræðingarnir hafi því ekki fyrr gefið álit sitt, hvorki á ríkisábyrgðinni né samningunum sjálfum. Í áliti lögfræðinganna er m.a. vikið að gjaldfellingarheimildum í Icesave-samningunum, í tengslum við lántöku ríkisins.

Skilgreining á erlendum skuldbindingum geti náð til þeirra einföldu ábyrgða sem ríkið hafi vegna Landsvirkjunar og Byggðastofnunar, svo dæmi sé tekið. Síðan segir í umsögn bankans: „Kröfu verður því ekki komið á ríkið fyrr en reynt hefur verið til þrautar að fá greitt hjá þessum aðilum. En samkvæmt þessum samningi [Icesave] gæti þetta lán og þar með öll erlend lán ríkisins gjaldfallið ef fyrrnefnd ríkisfyrirtæki greiddu ekki á gjalddaga.“

Lagaleg óvissa á sviði ESB-réttar

Lögfræðingar bankans segja ennfremur að enginn vafi sé á því að samningarnir falli undir einkarétt en sú skýring orki hins vegar tvímælis hvort um hefðbundna lánasamninga sé að ræða þar sem efni þeirra jafngildi ekki venjulegum lána- og viðskiptasamningum. Ríkið sé að taka á sig ábyrgð sem lagaleg óvissa ríki um á sviði ESB-réttar.