„Umræðan heima í Hollandi er alls ekki jafn neikvæð gagnvart Íslendingum og ég bjóst við,“ segir Carla Magnússon. Hún er hollensk en hefur verið búsett hér á landi í ellefu ár.

Hún hefur síðustu daga, í kjölfar ákvörðunar forseta Íslands að neita að staðfesta Icesave-lögin, fylgst ítarlega með umræðunni í heimalandi sínu. Hún segir að þeir sem til dæmis bloggi um fréttir í hollenskum fjölmiðlum og sýni íslenskum sjónarmiðum skilning séu mun fleiri en hinir. Það hafi að mörgu leyti komið sér á óvart því í fréttum hafi verið dregin upp önnur mynd og býsna dökk.

„Í fréttum fjölmiðla í Hollandi hefur sá misskilningur verið nokkuð áberandi að ákvörðun forsetans þýði að við ætlum ekki að standa við skuldbindingar okkar. Sumir sem hafa tjáð sig um málið á spjallsíðum hafa raunar lýst yfir ánægju með slíkt og það sé ekki ónýtt fyrir Íslendinga að eiga forseta sem hlustar á raddir fólksins. Á miðvikudagskvöldið höfðu 690 manns tjáð sig um málið á vefsetri dagblaðsins De Telegraaf og hefur væntanlega fjölgað síðan,“ segir Carla við Morgunblaðið.

„Ég hef líka séð því haldið fram að í raun sé sökin í Icesave-málinu ekki Íslendinga og Hollendingar sjálfir verði að axla nokkra ábyrgð í málinu. Wouter Bos, fjármálaráðherra Hollendinga, og stofnanir sem eiga að fylgjast með fjármálalífinu í landinu hafi ekki staðið við sínar skuldbindingar og leyft Landsbankanum án eftirlits að hefja starfrækslu Icesave-reikninganna í Hollandi.

Allt þetta verði að taka inn í myndina. Svo hafa þeir Hollendingar sem hafa tjáð sig um málið, einnig haldið því fram að óréttlátt sé að sækja svo hart að Íslendingum sem raun ber vitni. Margir í Hollandi hafi til dæmis tapað miklu á falli bandaríska fjárfestingabankans Lehman Brothers og ekki sé gengið fram af sömu hörkunni við að endurheimta þá fjármuni sem þá glötuðust,“ segir Carla.

Tengdar fréttir

Icesave

Bresk stjórnvöld létu Ísland róa

• Íslendingar í efnahagslegu stríði
• Icesave var stærsta dómsmál EFTA
• Hefði kostað 208 milljarða
• „Grýla er dauð“

» Fleiri tengdar fréttir