Ólafi Ragnari boðið til Davos

Ólafur Ragnar Grímsson, forseti Íslands, hefur þegið boð Alþjóðaefnahagsþingsins um að sitja ársþing þess í Davos í Sviss sem haldið er í þessari viku.

Ólafur Ragnar  mun taka þátt í umræðum í nokkrum málstofum á vettvangi alþjóðaþingsins sem og í aðalfundum þess. Þar verður meðal annars fjallað um viðbrögðin við hinni alþjóðlegu fjármálakreppu, samstarf ríkja við endurskipulagningu fjármálakerfis sem og ný viðhorf í ljósi þeirrar reynslu sem kreppan hefur fært þjóðum heims.

Forseti hefur samþykkt beiðnir nokkurra fjölmiðla um viðtöl meðan á þátttöku hans í alþjóðaþinginu í Davos stendur. Einnig mun hann hitta að máli forystumenn ýmissa ríkja og aðra áhrifamenn í alþjóðamálum, samkvæmt upplýsingum frá skrifstofu forsetaembættisins.

Þingið hefst í dag og tekur Ólafur Ragnar þátt í umræðum um viðbrögð stjórnvalda við hinni alþjóðlegu fjármálakreppu og hvernig hægt sé að leggja grundvöll að auknum stöðugleika í framtíðinni. Alþjóðaþinginu lýkur laugardaginn 30. janúar en þann dag mun Ólafur Ragnar einnig taka þátt í umræðum um hvernig endurreisn efnahagslífs geti komið í veg fyrir varanlegt atvinnuleysi.

• 3 blogg um fréttina

Bloggað um fréttina

• Guðlaugur Hermannsson: Erlendu fjölmiðlarnir líta á Ólaf sem valdamesta mann Íslands eftir …
• Benedikta E: Forseti Íslands Ólafur Ragnar Grímsson nýtur virðingar á erlendum vettvangi …
• Ómar Bjarki Smárason: Frábært - nú fáum við loksins kynningu á okkar málstað!