Fyrrverandi háttsettir yfirmenn í einum föllnu bankanna komust að því við yfirheyrslu hjá sérstökum saksóknara að lögreglan hafði ekki einungis beitt símahlustun í þágu rannsóknar heldur einnig hlerað fundarstað þar sem þeir hittust löngu eftir efnahagshrunið.
Í fréttaskýringu um þetta mál í Morgunblaðinu í dag kemur fram, að við yfirheyrslu hjá sérstökum saksóknara voru spilaðar upptökur úr síma til að hressa upp á minni þeirra sem verið var að yfirheyra. Svo var spurt út í tiltekinn fund mannanna sem haldinn var á skrifstofu í miðborginni löngu áður en yfirheyrslan fór fram.
Þegar kom í ljós að viðkomandi mundi ekki efni fundarins í smáatriðum var spiluð hljóðritun af fundinum til að hressa upp á minnið.
Ólafur Þór Hauksson, sérstakur saksóknari, kvaðst ekki geta svarað til um einstök mál en sagði að embættið notaði öll þau úrræði sem lög um meðferð sakamála byðu upp á.