Lög um gjaldeyrishöft hert

Frumvarp til breytinga á lögum um gjaldeyrishöft verður lagt fram á Alþingi í dag og er gert ráð fyrir að það fái hraðferð í gegnum þingið þannig að það verði orðið að lögum áður en markaðir verða opnaðir í fyrramálið. Frumvarpinu er ætlað að setja fyrir leka á gjaldeyrishöftum.

Þingflokkar voru óvænt boðaðir til þingflokksfunda laust eftir kl. 16 í dag. Á fundunum var frumvarpið kynnt. Óskað var eftir því við stjórnarandstöðuna að hún greiddi fyrir því að frumvarpið færi hratt í gegnum þingið.

Búið er að boða fund í efnahags- og viðskiptanefnd, en fyrirhugað er að nefndin leggi frumvarpið fram. Nefndin hefur hins vegar ekkert komið að undirbúningi málsins og frétti fyrst af málinu síðdegis í dag.

Mikil áhersla var lögð á það af hálfu stjórnvalda að ekkert fréttist af málinu fyrr en eftir að fjármálamörkuðum yrði lokað kl. 16 í dag. Stefnt er að því að frumvarpið verði að lögum í kvöld.

Öflugt eftirlit er með framkvæmd laga um gjaldeyriseftirlit, en nú hefur komið í ljós að þau „leka“, eins og kallað er. Fyrir þann leka á að setja með nýjum lögum.

• 3 blogg um fréttina

Bloggað um fréttina

• Ómar Ragnarsson: Eins og í hruninu 1947 - 48.
• Magnús Helgi Björgvinsson: Já, já! Segið svo að krónan sé á vetur setjandi!
• Hjördís Vilhjálmsdóttir: Ný göt