Nítján hafa leitað á slysadeild Landspítalans í morgun eftir að hafa slasast í óveðrinu á höfuðborgarsvæðinu. Sjö hafa verið fluttir á deildina með sjúkrabíl. Nokkrir eru með beinbrot og skurði, m.a. á höfði.
„Það er stórvarasamt að vera úti við þessar aðstæður,“ segir Ragna Gústafsdóttir, deildarstjóri á slysadeild. Slasað fólk hefur frá því í morgun leitað á slysadeild og segir Ragna að ekkert lát sé á þessu.
Ragna segir að þeir sem hafi slasast sé fullorðið fólk sem við venjulegar aðstæður ættu að þola talsvert veður, en hún sagði að nánast allir sem hefðu komið á slysadeild hefðu einfaldlega fokið í óveðrinu. Hún segir að greinilega hættulegt að vera nærri háhýsum og í þröngum götum þar sem vindstrengurinn er mestur.
„Fólk hefur komið hér með vafið um höfuðið eftir að hafa hlotið slæmar byltur. Nokkrir hafa einnig beinbrotnað,“ segir Ragna.