Um tuttugu manns komu saman við lögreglustöðina við Hverfisgötu klukkan 12 í dag og mótmæltu ómannúðlegri meðferð á Izekor Osazee, hælisleitanda frá Nígeríu. Hún var handtekin fyrirvaralaust í gær en látin laus síðar sama dag. Gengið verður frá lögreglustöðinni niður að innanríkisráðuneytinu.
Beðið verður með að flytja Izekor Osazee, hælileitanda frá Nígeríu, úr landi. Í gær var henni og lögmanni hennar, Helgu Völu Helgadóttur, gefið tækifæri til að leggja fram greinargerð þar sem Izekor getur óskað eftir því að dvelja hér á landi á meðal umsókn hennar um dvalarleyfi er til meðferðar.
Þetta segir Kristín Völundardóttir, forstjóri Útlendingastofnunar, í samtali við mbl.is en hún fundaði í innanríkisráðuneytinu í gær vegna málsins.
„Hér á landi virðist sem allt sé gert til þess að koma hælisleitendum úr landi, sérstaklega ef það liggur fyrir að þeir geti fest hér rætur og orðið lögmætur hluti af samfélaginu. Útlendingastofnun og innanríkisráðuneytið ætluðu að koma Izekor Osazee úr landi í skjóli nætur en drógu þá ákvörðun til baka þegar þeim varð ljóst að fólk fylgist með og lætur sig málið varða,“ sagði á facebooksíðu vegna mótmælanna.
Uppfært kl. 12.37: Tæplega 20 manns bættust í hópinn á leiðinni niður í innanríkisráðuneyti.
Uppfært kl. 13.25: Mótmælunum er nú lokið. Nokkrir mótmælendur söfnuðust saman í innanríkisráðuneytinu.
Í fyrstu komu þrír lögreglumenn og ræddu við starfsfólk ráðuneytisins en þegar um tíu lögregluþjónar komu á vettvang, fóru mótmælendurnir út úr húsinu.
Frétt mbl.is: Getur óskað eftir dvöl hér á landi.
Frétt mbl.is: Mótmæla vegna máls Izekor.
Frétt mbl.is: Izekor sleppt og ekki send burt
Frétt mbl.is: Eiginkona Íslendings send úr landi