Allir sakborningarnir fjórir í Marple-málinu svonefnda neituðu sök þegar málið var þingfest í Héraðsdómi Reykjavíkur í dag. Málið snýst að miklu leyti um fjármálagerninga sem snúa að Kaupþingi og Marple Holding S.A.SPF, sem var í eigu Skúla Þorvaldssonar.
Í Marple-málinu eru Hreiðar Már Sigurðsson, fyrrverandi forstjóri Kaupþings, og Guðný Arna Sveinsdóttir, fyrrverandi fjármálastjóri Kaupþings, ákærð fyrir fjárdrátt og umboðssvik. Magnús Guðmundsson, fyrrverandi forstjóri Kaupþings í Lúxemborg, er ákærður fyrir hlutdeild í fjárdrætti og umboðssvik Hreiðars Más og Guðnýjar Örnu og Skúli er ákærður fyrir hylmingu.