Sinueldur sem brann á 10-12 hektara svæði við Stokkseyri í gærkvöldi, og kviknaði aftur í morgun, var slökktur á hádegi í dag. Lárus Guðmundsson, hjá Brunavörnum Árnessýslu, segir vandlega hafa verið farið yfir svæðið og ólíklegt sé að eldur kvikni þar að nýju.
„Það er samt aldrei hægt að fullyrða það,“ segir hann. „Þetta var stórt svæði sem brann í gær svo það er erfitt að segja hundrað prósent til um það, en okkur sýnist vera að fara að rigna svo þá mun blotna upp í þessu.“
Talið er að sinueldur hafi kviknað á áttunda tímanum í gær er fugl flaug á háspennulínu. Ekki var hægt að koma neinum bílum eða öðrum tækjum á svæðið og gengu slökkviliðsmenn því um svæðið og börðu niður eldinn. Þá flaug starfsmaður Brunavarna yfir svæðinu í gær og gat leiðbeint slökkviliðsmönnum á jörðu niðri þegar reykurinn varð svo þéttur að vart sást út úr augum.
Búið var að slökkva í síðustu glæðunum um klukkan 1 í nótt, en eldur kviknaði svo aftur á svæðinu um klukkan 10 í morgun að sögn Lárusar. Hann fór á svæðið ásamt 15-20 manna liði sem tókst að slökkva eldinn rétt fyrir hádegi.
Umfang eldsins í morgun var mun minna en í gær og þökk sé meira logni var auðveldara að slökkva eldinn. Svæðið var þó mjög erfitt yfirferðar að sögn Lárusar en þar er mikið votlendi og mói sem erfitt sé að eiga við. Hins vegar hafi verið gripið til þess ráðs að fá lánaða kajaka hjá Kajakleigunni á Stokkseyri og ferja slökkviliðsmenn yfir lítil vötn sem eru úti um allt á svæðinu til að komast nær eldinum.
Hann segir að glóð geti lengi leynst í sinu enda hefur verið mjög þurrt á svæðinu undanfarið.
Frétt mbl.is: Eldurinn kviknaði aftur
Frétt mbl.is: Fugl kveikti eldinn
Frétt mbl.is: Mikill sinubruni við Stokkseyri