Vatn flæddi inn í sextán íbúðir aldraðra í Neskaupstað í morgun. Flestir íbúarnir eru komnir til ættingja sinna en einn fær gistingu á hjúkrunardeild Heilbrigðisstofnunar Austurlands. Vonast er til að fólkið komist aftur til síns heima fyrir helgi.
Um þrjátíu manns voru að störfum í íbúðunum í morgun þegar mest var. Slökkvilið bæjarins var ekki kallað á vettvang en iðnaðarmenn, sjálfboðaliðar og aðstandendur komu til aðstoðar.
Búið er að rífa upp parketið í sjö íbúðum.
Um er að ræða þriggja hæða fjölbýlishús og flæddi vatn inn á jarðhæðina og hæðina fyrir neðan.
„Verst í þessu er raskið fyrir fólkið,“ segir Marinó Stefánsson, umhverfisstjóri Fjarðabyggðar. „Það er óveður hérna. Það renna lækir yfir götur á þremur stöðum og yfir lóðir með tilheyrandi tjóni. Niðurföllin hafa ekki undan.“
Hann segir vatn hafa áður flætt inn í íbúðirnar fyrir aldraða en ekki eins mikið og núna.
Að sögn Þorsteins Guðjónssonar bæjarverkfræðings eru gröfur úti um allt í Neskaupstað við að moka upp úr stífluðum lækjum. Bæjarstarfsmenn eru einnig önnum kafnir.
Hann telur að aðalvatnsveitulögnin sé líkast til biluð og reiknar með vatnsskorti í bænum eftir tvo til þrjá klukkutíma.
Enn á eftir að finna út hvar lögnin bilaði.
Frétt mbl.is: Tjónið nemur tugum milljóna
Frétt mbl.is: Þak fauk af húsi á Egilsstöðum