Lögreglan á Vesturlandi rannsakar enn brunann í Hótel Ljósalandi í lok janúar. Beðið er eftir gögnum frá sérfræðingum sem lögðu mat á vissa þætti málsins, meðal annars frá Mannvirkjastofnun. Karlmaður sætti gæsluvarðhaldi um tíma grunaður um að hafa kveikt í hótelinu.
Tilkynnt var um að eldur væri laus í hótelinu í Saurbæ í Dalasýslu aðfaranótt 31. janúar. Skömmu áður hafði lögreglu verið tilkynnt um ölvaðan mann sem gengi berserksgang fyrir utan hótelið. Maðurinn var handtekinn og sætti gæsluvarðhaldi þar til í byrjun febrúar.
Samkvæmt upplýsingum frá lögreglunni á Vesturlandi er beðið eftir mati sérfræðinga áður en hægt er að ljúka rannsókninni og ákveða hvort ákæra verði gefin út í málinu. Hún áætlar að einhverra vikna bið geti verið eftir niðurstöðum sérfræðinganna.
Talið er að um þriðjungur hótelsins sé ónýtur eftir brunann en engi slys urðu á fólki við hann.