Enn liggur ekki fyrir hvenær ljósbogaofn kísilmálmsmiðju United Silicon verður ræstur aftur. Kristleifur Andrésson, stjórnandi öryggis- og umhverfismála hjá United Silicon, segir það þó örugglega ekki verða í þessari viku.
Ofninn hefur ekki verið í gangi frá því að eldur kom upp í kísilmálmverksmiðjunni þriðjudaginn 18. apríl. Viku síðar sendi Umhverfisstofnun frá sér tilkynningu um að stofnunin hafi stöðvað rekstur verksmiðjunnar vegna ítrekaðrar lyktarmengunar og að ofninn verði ekki ræstur aftur nema að gefnu leyfi og í samráði við stofnunina.
United Silicon gerði ekki athugasemdir við þá ákvörðun og hafa sérfræðingar frá norska ráðgjafafyrirtækinu Multikonsult undanfarnar vikur aðstoðað fyrirtækið við að draga úr menguninni. Sérfræðingar frá framleiðanda ljósbogaofnsins hafa sömuleiðis unnið að því að bæta stöðugleika ofnsins, enda er talið að lyktin sem íbúar Reykjanesbæjar finna komi þegar ofninn er undir ákveðnu álagi eða þegar slokknar á honum.
„Það er ekki komin tími á að ræsa ofninn, en það verður ekki í þessari viku. Við erum langt komin með þessar framkvæmdir sem þarf að vinna í þessu, þannig að við horfum vongóðir til þess að klára í næstu viku,“ segir Kristleifur. Ljósbogaofninn verði því mögulega ræstur seinni hluta næstu viku eða í byrjun þarnæstu viku.
„En þetta veltur svolítið á hvernig okkur gengur að vinna á morgun og um helgina,“ segir hann
Kristleifur útskýrir að sérfræðingar frá framleiðanda ofnsins hafi unnið að miklum lagfæringum og breytingum frá því að slökkt var á ofninum. „Þetta er tímafrek vinna og síðan hefur líka þurft að bíða eftir ákveðnum varahlutum og íhlutum sem eiga að hjálpa okkur í þessu.“
Multikonsult lagði einnig til að leitað yrði til norsku loftrannsóknastofnunarinnar NILU (Norsk institutt for luftforskning) um að framkvæma mælingar á loftgæðum í nágrenni verksmiðjunnar þegar ljósbogaofninn verður ræstur að nýju. Kristleifur kveðst vita til þess að það hafi verið gert. Starfsmenn United Silicon séu hins vegar ekki í neinu sambandi við NILU.
„Stofnunin ræðir alfarið við sérfræðinga Multikonsult, sem gefa síðan rautt eða grænt ljós á að ofninn verði ræstur,“ segir hann.