Innlent | Morgunblaðið | 29.9.2017 | 5:30 | Uppfært 6:07

Óvissustig á Austurlandi

Gífurlegt vatn flæddi yfir túnin við bæinn Valþjófsstað 2 á Fljótsdalshéraði. Á þriðja tug lamba drukknaði og ekki er vitað um afdrif svipaðs fjölda. mbl.is/Eggert Jóhannesson

Ríkislögreglustjóri, í samráði við lögreglustjórann á Suðurlandi, lýsti í gær yfir óvissustigi almannavarna vegna úrkomu og vatnavaxta á Austurlandi. Lítil úrkoma var á svæðinu í gær en gera má ráð fyrir rigningu og vatnavöxtum á Suðausturlandi og Austfjörðum fram eftir laugardegi.

Áætlað er að forsætisráðherra, Bjarni Benediktsson og samgönguráðherra, Jón Gunnarsson auk vegamálastjóra Hreins Haraldssonar fari austur í fyrramálið til að kynna sér aðstæður á Suðausturlandi og Austfjörðum, að því gefnu að það viðri til flugs að því er fram kemur á Facebook-síðu lögreglunnar á Suðurlandi.

Vatnsyfirborð hækkaði mikið í gær en vöxturinn var hægur og rólegur seinni hluta dagsins. Að sögn lögregluvarðstjóra vantar talsvert upp á að fljótið nái sambærilegum vexti og árið 2002. Ekki er því búist við að flæði yfir Lagarfljótsbrú eins og staðan var í gærkvöldi.

Að sögn Friðriks Inga Ingólfssonar, bónda á Valþjófsstað 2 í Fljótsdal, var ástandið skelfilegt í fyrradag en þar drukknaði á þriðja tug lamba og talsverðar skemmdir urðu á girðingum. Þá drápust tugir kinda þegar stór aurskriða féll í Hamarsfirði.

Þjóðvegur 1 áfram lokaður

Þjóðvegurinn verður áfram lokaður við Hólmsá á Mýrum en vegurinn hefur verið grafinn í sundur á þremur stöðum til að koma í veg fyrir frekara tjón. Ekki er útlit fyrir að hann opnist allra næstu daga. Miklar skemmdir hafa orðið á samgöngumannvirkjum og Steinavatnabrú í Suðursveit er lokuð vegna skemmda. Vegagerðin vinnur að því að koma upp bráðabirgðabrú. Talsverður fjöldi strandaglópa er á svæðinu en lögreglan á Suðurlandi sagði í tilkynningu í gær að dæmi væru um að bílaleigur sýndu ferðamönnum ekki skilning á þeirri neyð sem þeir búa við vegna flóðanna, en einhverjir ferðamenn hafa þurft að skilja bílaleigubíla eftir á flóðasvæðinu.