Innlent | mbl | 5.7.2021 | 12:50

Alltaf ákveðið hlutfall bólusettra sem smitast

mbl.is/Eggert Jóhannesson

Kórónuveirusmitið sem greindist utan sóttkvíar á laugardag greindist hjá bólusettum einstakling. Bæði smitin sem greindust utan sóttkvíar á síðustu dögum tengjast landamærunum. Hinir smituðu fóru í skimun fyrir Covid-19 við landamærin, eins og allir þurftu að gera við komuna til landsins fyrir mánaðamót, og greindust þá ekki smitaðir.

Ekki er vitað hvort sá sem greindist smitaður utan sóttkvíar á fimmtudag hafi verið bólusettur.

„Þótt okkur langi öll að vera 100% bólusett þá er alltaf ákveðinn hluti af bólusettum sem mun greinast með Covid,“ segir Hjördís Guðmundsdóttir, upplýsingafulltrúi almannavarnadeildar ríkislögreglustjóra, um smitið sem greindist hjá bólusettum einstaklingi.

Frétt af mbl.is

Tvö smit innanlands, bæði utan sóttkvíar

Reglurnar alltaf í endurskoðun

Frá 1. júlí síðastliðnum hafa þeir sem eru bólusettir gegn Covid-19 og þeir sem hafa sögu um fyrri sýkingu ekki þurft að fara í skimun við komuna til landsins. Spurð hvort smitin sem hafa greinst utan sóttkvíar hjá bólusettum undanfarið sýni að skimun þess hóps sé nauðsynleg áfram segir Hjördís:

„Ég hugsa að það sé alltaf í endurskoðun þótt það sé alls ekki eitthvað sem liggur á borðinu núna. Allar reglur eru alltaf í endurskoðun.“

Frétt af mbl.is

Afnám sýnatöku flýti fyrir á vellinum

Innan við tveir tugir sem fara í sóttkví

Smitið sem greindist á fimmtudag greindist hjá einstaklingi sem var á leið úr landi og fór í PCR-próf til þess að geta komist á áfangastað. Seinna smitið greindist hjá einstaklingi sem kom hingað til lands bólusettur, greindist ekki smitaður í skimun við landamærin en fór í skimun nokkrum dögum eftir að hann kom hingað til lands.

„Þetta hefur einhver samfélagsleg áhrif. Það eru innan við tveir tugir sem eru farnir í sóttkví vegna þessa smits en það er búið að ná utan um það,“ segir Hjördís.